ابڙو اڪيڊمي Abro Academy
2020-07-22
داخلا نمبر 633
عنوان لاکو ڄاڃي ننڍو
شاخ پکي
پڙهيو ويو 492
داخلا جو حوالو:
لاکو ڄاڃي ننڍو
لاکو ڄاڃي ننڍو
لاکو ڄاڃي ننڍو
100ـ 80 سينٽي ميٽر جسامت جو هي پکي ٿلهي ليکي وڏي لاکي ڄاڃيءَ جهڙو ئي آهي پر غور ڪرڻ سان ان جون امتيازي وصفون ڏسي سگهبيون. هن جي جسم جا کنڀ گلابي ۽ چهنب ڪارڙي ٿئيس ٿي.
هن جو قد وڏي لاکي ڄاڃيءَ کان ننڍو آهي. ڳچي ننڍي ۽ ڪجهه ٿلهڙي ٿئيس ٿي. چهنب به ننڍي ٿئيس ٿي ۽ وڌيڪ نمايان طور مڙيل هوندي آهي.
بالغ پکيءَ جي ڳاڙهي چهنب جي نوڪ ڪاري ٿئي ٿي. چهري جي کل ۽ اک جي ماڻڪيءَ جو رنگ گهرو ڳاڙهو آهي. مٿو، جسم ۽ ڳچي گلابي اٿس ۽ پرن جا پاساوان کنڀ گـهِرا گلابي ٿين ٿا. پرن جا پويان کنڀ ڪارا هوندا اٿس، جيڪي ان وقت واضح نظر ايندا آهن، جڏهن پَر پکيڙيندو آهي. ان جي چهنب جو رنگ عمر سان بدلجندو آهي. ٻچن جي چهنب سرمائي ناسي هوندي آهي، جنهن تي واڱڻائي ناسي ڪاري نوڪ هوندي آهي. انهن جون ٽنگون به سرمائي ٿين ٿيون. کاري ۽ ٻاڙي پاڻيءَ تي ڏسبو آهي.
قاز وانگر تيز آواز ٽرانڪ ڪندو آهي. تانگهي پاڻيءَ ۾ ترندي يا هلندي ڳچي هيڏانهن هوڏانهن ڦيرائي وڪوڙيل چهنب سان خوراڪ ميڙيندو ويندو آهي. الجي ۽ مائڪرو اسڪوپڪ ناميات کائي ٿو.
جُون ۽ جولاءِ ۾، ۽ ڪڏهن جنوري فيبروري تائين افزائش نسل ڪري ٿو، پر ان جو داومدار خوراڪ تي آهي. هن جو آکيرو وڏي لاکي جهڙو ئي ٿئي ٿو.
ٻاڙيون ۽ کاري پاڻيءَ جون ڪنڌيون ان جو مسڪن آهن.. گجرات ۽ رڻ ڪڇ ۾ افزائش ڪندو آهي، غير افزائشي مند ۾ سنڌ هند ۾ پکڙجي ويندو آهي. سنڌ، مڪران کان تامل نائڊو ۽ اڙيسيا تائين پکڙجي ويندو آهي. سنڌو ڊيلٽا ۾ نظر ايندو آهي، خاص ڪري اوڀر طرف.